ਭਾਜਪਾ ਦੇ ਸੰਸਦ ਮੈਂਬਰ ਅਤੇ ਭਾਰਤੀ ਕੁਸ਼ਤੀ ਫੈਡਰੇਸ਼ਨ ਦੇ ਪ੍ਰਧਾਨ ਵਜੋਂ ਆਪਣੇ ਕਾਰਜਕਾਲ ਦੌਰਾਨ ਬ੍ਰਿਜ ਭੂਸ਼ਣ ਸ਼ਰਨ ਸਿੰਘ ਵੱਲੋਂ ਮਹਿਲਾ ਪਹਿਲਵਾਨਾਂ ਦੇ ਕਥਿਤ ਜਿਨਸੀ ਸ਼ੋਸ਼ਣ ਦੇ ਖਿਲਾਫ ਭਾਰਤ ਦੇ ਨਾਮਵਰ ਪਹਿਲਵਾਨਾਂ ਵੱਲੋਂ ਵਿਰੋਧ ਪ੍ਰਦਰਸ਼ਨ ਜਾਰੀ ਹਨ।
ਸਟਾਰ ਪਹਿਲਵਾਨ ਵਿਨੇਸ਼ ਫੋਗਾਟ ਨੇ ਬ੍ਰਿਜ ਭੂਸ਼ਣ ਸ਼ਰਮਾ ‘ਤੇ ਮਹਿਲਾ ਪਹਿਲਵਾਨਾਂ ਦਾ ਜਿਨਸੀ ਸ਼ੋਸ਼ਣ ਕਰਨ ਦਾ ਦੋਸ਼ ਲਗਾਇਆ ਸੀ। ਭਾਰਤੀ ਖੇਡਾਂ ਅਤੇ ਗਵਰਨਿੰਗ ਬਾਡੀ ਸਾਈ ਲਈ ਵਿਵਾਦ ਕੋਈ ਨਵੀਂ ਗੱਲ ਨਹੀਂ ਹਨ।ਇਤਿਹਾਸ ਦੇ ਪੰਨਿਆਂ ‘ਤੇ ਝਾਤ ਮਾਰੀਏ ਤਾਂ ਦੇਸ਼ ਦੀਆਂ ਮੋਹਰੀ ਖਿਡਾਰਨਾਂ ਨਾਲ ਕੀਤੇ ਗਏ ਦੁਰਵਿਵਹਾਰ ਅਤੇ ਜਿਨਸੀ ਸ਼ੋਸ਼ਣ ਦੇ ਦੋਸ਼ਾਂ ਦੀਆਂ ਕਈ ਘਟਨਾਵਾਂ ਦੇਖਣ ਨੂੰ ਮਿਲ ਸਕਦੀਆਂ ਹਨ। ਖੇਡਾਂ ਨੂੰ ਜਦੋਂ ਉਦੇਸ਼ਪੂਰਣ ਯੋਜਨਾਬੱਧ ਤਰੀਕੇ ਨਾਲ ਕੀਤਾ ਜਾਂਦਾ ਹੈ, ਤਾਂ ਇਹ ਸਾਨੂੰ ਮੈਦਾਨ ਵਿੱਚ ਅਤੇ ਬਾਹਰ, ਸਨਮਾਨ ਅਤੇ ਸਮਾਨਤਾ ਵਰਗੀਆਂ ਕਦਰਾਂ-ਕੀਮਤਾਂ ਨੂੰ ਲਾਗੂ ਕਰਨ ਦਾ ਵਾਤਾਵਰਣ ਅਤੇ ਮੌਕਾ ਪ੍ਰਦਾਨ ਕਰਦੀਆਂ ਹਨ। ਇਸ ਨਾਲ ਲੰਿਗ ਅਸਮਾਨਤਾਵਾਂ ਅਤੇ ਔਰਤਾਂ ਵਿਰੁੱਧ ਹਿੰਸਾ ਨੂੰ ਘਟਾਇਆ ਜਾ ਸਕਦਾ ਹੈ। ਮਹਿਲਾ ਖੇਡਾਂ ਦੀ ਸ਼ੁਰੂਆਤ ਤੋਂ ਹੀ ਮਹਿਲਾ ਅਥਲੀਟਾਂ ਪ੍ਰਤੀ ਜਿਨਸੀ ਸ਼ੋਸ਼ਣ ਇੱਕ ਸਮੱਸਿਆ ਰਿਹਾ ਹੈ।ਜ਼ਿਆਦਾਤਰ ਜਿਨਸੀ ਦੁਰਵਿਵਹਾਰ ਖੇਡ ਉਦਯੋਗ ਦੇ ਅੰਦਰ ਸੱਤਾ ਦੇ ਅਹੁਦਿਆਂ ‘ਤੇ ਬੈਠੇ ਲੋਕਾਂ ਦੁਆਰਾ ਹੀ ਕੀਤਾ ਜਾਂਦਾ ਹੈ, ਜਿਸ ਵਿਚ ਅਕਸਰ ਕੋਚ ਵੀ ਸ਼ਾਮਿਲ ਹੁੰਦੇ ਹਨ। ਇਹ ਸਾਰੀਆਂ ਖੇਡਾਂ ਅਤੇ ਹਰ ਪੱਧਰ ‘ਤੇ ਵਾਪਰਦਾ ਹੈ। ਖੇਡ ਉਦਯੋਗ ਦੇ ਅੰਦਰ ਜਿਨਸੀ ਪਰੇਸ਼ਾਨੀ ਅਤੇ ਦੁਰਵਿਵਹਾਰ ਨੂੰ ਸਮਾਜਿਕ ਸਥਿਤੀਆਂ ਦੇ ਕਾਰਨ ਬਹੁਤ ਘੱਟ ਰਿਪੋਰਟ ਕੀਤੇ ਜਾਣ ਦਾ ਸ਼ੱਕ ਹੈ। ਬਹੁਤ ਸਾਰੇ ਇਸ ਡਰੋਂ ਅੱਗੇ ਆਉਣ ਤੋਂ ਝਿਜਕਦੇ ਹਨ ਕਿ ਉਨ੍ਹਾਂ ‘ਤੇ ਵਿਸ਼ਵਾਸ ਨਹੀਂ ਕੀਤਾ ਜਾਵੇਗਾ ਜਾਂ ਅਪਰਾਧੀਆਂ ਦੇ ਪੱਖ ਵਿੱਚ ਉਨ੍ਹਾਂ ਦੀ ਅਣਦੇਖੀ ਕੀਤੀ ਜਾਵੇਗੀ।
ਸੂਚਨਾ ਦੇ ਅਧਿਕਾਰ ਦੀ ਅਰਜ਼ੀ ਤੋਂ ਇਕੱਠੇ ਕੀਤੇ ਅੰਕੜਿਆਂ ਅਨੁਸਾਰ, ਇਹ ਪਾਇਆ ਗਿਆ ਕਿ ੨੦੧੦ ਤੋਂ ੨੦੨੦ ਦੇ ਵਿਚਕਾਰ, ਸਾਈ ਨੂੰ ਜਿਨਸੀ ਸ਼ੋਸ਼ਣ ਦੀਆਂ ੪੫ ਸ਼ਿਕਾਇਤਾਂ ਆਈਆਂ, ਜਿਨ੍ਹਾਂ ਵਿੱਚੋਂ ੨੯ ਕੋਚਾਂ ਵਿਰੁੱਧ ਸਨ। ਜ਼ਿਕਰਯੋਗ ਹੈ ਕਿ ਵਿਨੇਸ਼ ਫੋਗਾਟ ਨੇ ਪਹਿਲਾਂ ਦੋਸ਼ ਲਗਾਇਆ ਸੀ ਕਿ ਡਬਲਯੂਐੱਫਆਈ ਦੇ ਚਹੇਤੇ ਕੋਚ ਔਰਤਾਂ ਨਾਲ ਦੁਰਵਿਵਹਾਰ ਕਰਦੇ ਹਨ ਅਤੇ ਉਨ੍ਹਾਂ ਨੂੰ ਪਰੇਸ਼ਾਨ ਕਰਦੇ ਹਨ। ਉਸ ਨੇ ਕੁਸ਼ਤੀ ਫੈਡਰੇਸ਼ਨ ਦੇ ਮੁਖੀ ਬ੍ਰਿਜ ਭੂਸ਼ਣ ਸ਼ਰਨ ਸਿੰਘ ‘ਤੇ ਲੜਕੀਆਂ ਦਾ ਜਿਨਸੀ ਸ਼ੋਸ਼ਣ ਕਰਨ ਅਤੇ ਟੋਕੀਓ ਓਲੰਪਿਕ ੨੦੨੦ ਵਿੱਚ ਉਸਦੀ ਹਾਰ ਤੋਂ ਬਾਅਦ ਉਸ ਨੂੰ ‘ਖੋਟਾ ਸਿੱਕਾ’ ਕਹਿਣ ਦਾ ਦੋਸ਼ ਵੀ ਲਾਇਆ।ਅਥਲੀਟ ਇੱਕ ਸੰਗਠਿਤ ਪ੍ਰਣਾਲੀ ਦੀ ਮੰਗ ਕਰ ਰਹੇ ਹਨ ਜਿਸ ਨਾਲ ਔਰਤਾਂ ਆਪਣੇ ਕਰੀਅਰ ਨੂੰ ਨੁਕਸਾਨ ਪਹੁੰਚਾਉਣ ਦੇ ਡਰ ਤੋਂ ਬਿਨਾਂ ਸ਼ਿਕਾਇਤਾਂ ਸਾਂਝੀਆਂ ਕਰ ਸਕਦੀਆਂ ਹਨ । ਜਿਨਸੀ ਪਰੇਸ਼ਾਨੀ ਅਤੇ ਦੁਰਵਿਵਹਾਰ ਖੇਡ ਦੇ ਸੱਭਿਆਚਾਰ ਅਤੇ ਸ਼ਕਤੀ ਅਤੇ ਅਧਿਕਾਰ ਦੇ ਸ਼ੋਸ਼ਣ ਦੇ ਮੌਕਿਆਂ ਵਿਚੋਂ ਪੈਦਾ ਹੁੰਦਾ ਹੈ ਜੋ ਇਹ ਕੋਚਾਂ ਨੂੰ ਦਿੰਦਾ ਹੈ। ਜਿਨਸੀ ਪਰੇਸ਼ਾਨੀ ਦੀਆਂ ਆਮ ਤੌਰ ‘ਤੇ ਰਿਪੋਰਟ ਕੀਤੀਆਂ ਕਿਸਮਾਂ ਵਿੱਚ ਸ਼ਾਮਲ ਹਨ “‘ਵਾਰ-ਵਾਰ ਅਣਚਾਹੇ ਜਿਨਸੀ ਤੌਰ ‘ਤੇ ਸੁਝਾਅ ਦੇਣ ਵਾਲੀਆਂ ਨਜ਼ਰਾਂ, ਚੁਟਕਲੇ, ਟਿੱਪਣੀਆਂ, ਆਦਿ’, ‘ਅਣਚਾਹੇ ਸਰੀਰਕ ਸੰਪਰਕ’, ਅਤੇ ‘ਮਖੌਲ’ ਆਦਿ। ਖੇਡਾਂ ਵਿਚ ਅਧੀਨਗੀ ਦਾ ਸੱਭਿਆਚਾਰ ਹੁੰਦਾ ਹੈ ਜਿਸ ਕਰਕੇ ‘ਗਰੂਮਿੰਗ’ (ਜਿਨਸੀ ਸੋਸ਼ਣ ਲਈ ਨਾਬਾਲਗ ਨੂੰ ਤਿਆਰ ਕਰਨਾ) ਆਮ ਹੋ ਜਾਂਦੀ ਹੈ, ਜਿਸ ਨਾਲ ਅਥਲੀਟਾਂ ਲਈ ਅੱਗੇ ਆਉਣਾ ਅਤੇ ਸ਼ਿਕਾਇਤ ਕਰਨਾ ਬਹੁਤ ਮੁਸ਼ਕਲ ਹੋ ਜਾਂਦਾ ਹੈ। ਕਈ ਤਰੀਕਿਆਂ ਨਾਲ, ਇੱਕ ਕੋਚ ਕੋਲ ਇੱਕ ਅਥਲੀਟ ਉੱਤੇ ਮਹੱਤਵਪੂਰਣ ਨਿਯੰਤ੍ਰਣ ਹੁੰਦਾ ਹੈ। ਰਵਾਇਤੀ ਤੌਰ ‘ਤੇ, ਅਥਲੀਟ ਆਪਣੇ ਕੋਚ ‘ਤੇ ਭਰੋਸਾ ਰੱਖਦੇ ਹਨ, ਉਨ੍ਹਾਂ ਦੀ ਸਲਾਹ ਲੈਂਦੇ ਹਨ ਅਤੇ ਉਨ੍ਹਾਂ ਦੀਆਂ ਹਦਾਇਤਾਂ ਦੀ ਬੇਲੋੜੀ ਪਾਲਣਾ ਕਰਦੇ ਹਨ ਕਿਉਂਕਿ ਕੋਚ ਨੂੰ ਖੇਡ ਬਾਰੇ ਵਧੇਰੇ ਜਾਣਕਾਰੀ ਅਤੇ ਅਨੁਭਵ ਹੁੰਦਾ ਹੈ। ਕੋਚ ਜਾਂ ਤਾਂ ਐਥਲੀਟਾਂ ਦੇ ਸਵੈ-ਮਾਣ ਨੂੰ ਵਧਾ ਸਕਦੇ ਹਨ ਜਾਂ ਘਟਾ ਸਕਦੇ ਹਨ, ਅਤੇ ਉਹਨਾਂ ਦਾ ਅਥਲੀਟਾਂ ਦੀ ਭਾਗੀਦਾਰੀ ਅਤੇ ਸਫਲਤਾ ‘ਤੇ ਮਹੱਤਵਪੂਰਨ ਨਿਯੰਤਰਣ ਹੁੰਦਾ ਹੈ।
ਇਹ ਸਪੱਸ਼ਟ ਹੈ ਕਿ ਦੁਨੀਆ ਵਿੱਚ ਕਿਤੇ ਵੀ, ਜਦੋਂ ਕਮਜ਼ੋਰ ਮਹਿਲਾ ਅਥਲੀਟਾਂ ਨੂੰ ਇੱਕ ਪੁਰਸ਼ ਕੋਚ ਦੇ ਇੰਚਾਰਜ ਵਿੱਚ ਰੱਖਿਆ ਜਾਂਦਾ ਹੈ, ਤਾਂ ਇਹ ਖ਼ਤਰਾ ਮੌਜੂਦ ਹੁੰਦਾ ਹੈ ਕਿ ਉਹ ਉਨ੍ਹਾਂ ਨੂੰ ਆਪਣਾ ਸ਼ਿਕਾਰ ਬਣਾ ਸਕਦਾ ਹੈ।ਇਹ ਇੱਕ ਬਹੁਤ ਹੀ ਗੁੰਝਲਦਾਰ ਸਥਿਤੀ ਹੈ, ਅਤੇ ਖੇਡ ਫੈਡਰੇਸ਼ਨਾਂ ਤੋਂ ਸੁਤੰਤਰ ਨਿਗਰਾਨ ਵਿਧੀ ਮਹਿਲਾ ਐਥਲੀਟਾਂ ਦੀ ਸੁਰੱਖਿਆ ਵੱਲ ਪਹਿਲਾ ਕਦਮ ਹੋਵੇਗਾ। ਸਾਈ (ਸਪੋਰਟਸ ਅਥਾਰਟੀ ਆਫ਼ ਇੰਡੀਆ) ਨੇ ਸਾਰੀਆਂ ਫੈਡਰੇਸ਼ਨਾਂ ਲਈ ਇਹ ਯਕੀਨੀ ਬਣਾਉਣਾ ਲਾਜ਼ਮੀ ਕਰ ਦਿੱਤਾ ਹੈ ਕਿ ਘਰੇਲੂ ਅਤੇ ਅੰਤਰਰਾਸ਼ਟਰੀ ਯਾਤਰਾ ਦੌਰਾਨ ਮਹਿਲਾ ਅਥਲੀਟਾਂ ਦੇ ਨਾਲ ਇੱਕ ਮਹਿਲਾ ਕੋਚ ਹੋਵੇ। ਸਾਈ ਨੇ ਫੈਡਰੇਸ਼ਨਾਂ ਨੂੰ ਇਹ ਯਕੀਨੀ ਬਣਾਉਣ ਲਈ ਰਾਸ਼ਟਰੀ ਕੈਂਪਾਂ ਅਤੇ ਟੂਰਾਂ ‘ਤੇ ‘ਅਨੁਪਾਲਨ ਅਧਿਕਾਰੀ’ ਨਿਯੁਕਤ ਕਰਨ ਲਈ ਕਿਹਾ ਹੈ ਤਾਂ ਜੋ ‘ਜਿਨਸੀ ਪਰੇਸ਼ਾਨੀ ਦੀ ਰੋਕਥਾਮ ‘ਤੇ ਸਟੈਂਡਰਡ ਓਪਰੇਟਿੰਗ ਪ੍ਰਕਿਰਿਆ’ ਦੀ ਪਾਲਣਾ ਕੀਤੀ ਜਾ ਸਕੇ, ਅਤੇ ਕਿਸੇ ਵੀ ਉਲੰਘਣਾ ਦੀ ‘ਜਲਦੀ ਤੋਂ ਜਲਦੀ’ ਰਿਪੋਰਟ ਕੀਤੀ ਜਾਵੇ।
ਪੀਐਮ ਮੋਦੀ ਖੇਡਾਂ ਦੀ ਵਰਤੋਂ ਰਾਸ਼ਟਰ ਦੀ ਪ੍ਰੋਫਾਈਲ ਨੂੰ ਉੱਚਾ ਚੁੱਕਣ ਲਈ ਕਰਨਾ ਚਾਹੁੰਦੇ ਹਨ, ਪਰ ਮਹਿਲਾ ਪਹਿਲਵਾਨਾਂ ਦੇ ਮੁੱਦਿਆਂ ‘ਤੇ ਪੀਐਮ ਮੋਦੀ ਨੇ ਚੁੱਪੀ ਧਾਰੀ ਹੋਈ ਹੈ।ਉਨ੍ਹਾਂ ਨੂੰ ਤੁਰੰਤ ਭਾਰਤੀ ਖੇਡਾਂ ਨੂੰ ਔਰਤਾਂ ਲਈ ਸੁਰੱਖਿਅਤ ਬਣਾਉਣ ਲਈ ਇਹ ਯਕੀਨੀ ਬਣਾਉਣਾ ਚਾਹੀਦਾ ਹੈ ਕਿ ਸਿਸਟਮ ਵਿੱਚ ਜਿਨਸੀ ਸੋਸ਼ਣਕਾਰੀਆਂ ਨੂੰ ਸਜ਼ਾ ਦਿੱਤੀ ਜਾਵੇ। ਮਹਿਲਾ ਅਥਲੀਟਾਂ ਦਾ ਜਿਨਸੀ ਸ਼ੋਸ਼ਣ, ਪਾਰਦਰਸ਼ਤਾ ਦੀ ਘਾਟ ਅਤੇ ਰਾਜਨੀਤਿਕ ਸ਼ਕਤੀ ਵਾਲੇ ਸ਼ਕਤੀਸ਼ਾਲੀ ਪ੍ਰਬੰਧਕਾਂ ਦਾ ਹੰਕਾਰ ਸੈਂਕੜੇ ਐਥਲੀਟਾਂ ਦੇ ਕਰੀਅਰ ਨੂੰ ਤਬਾਹ ਕਰ ਰਿਹਾ ਹੈ। ਸੱਤਾਧਾਰੀ ਪਾਰਟੀ ਭਾਜਪਾ ਦੇ ਸੰਸਦ ਮੈਂਬਰ ਅਤੇ ਡਬਲਯੂਐਫਆਈ ਦੇ ਪ੍ਰਧਾਨ ਬ੍ਰਿਜ ਭੂਸ਼ਣ ਸਿੰਘ ਖੇਡ ਫੈਡਰੇਸ਼ਨਾਂ ਦੇ ਉਨ੍ਹਾਂ ਮੁਖੀਆਂ ਦੀ ਅਪਵਿੱਤਰ ਪਰੰਪਰਾ ਨੂੰ ਜਾਰੀ ਰੱਖ ਰਿਹਾ ਹੈ ਜੋ ਆਪਣੀ ਸ਼ਕਤੀ ਦੀ ਦੁਰਵਰਤੋਂ ਕਰਦੇ ਹਨ। ਭਾਰਤੀ ਖਿਡਾਰੀਆਂ, ਸਪਾਂਸਰਾਂ ਅਤੇ ਪ੍ਰਸ਼ੰਸਕਾਂ ਦੀ ਨਿਰਾਸ਼ਾ ਇਹ ਹੈ ਕਿ ਸਾਡੇ ਖੇਡ ਪ੍ਰਸ਼ਾਸਕਾਂ ਲਈ ਨਹੀਂ ਬਲਕਿ ਖਿਡਾਰੀਆਂ ਲਈ ਇੱਕ ਬਿਹਤਰ ਵਿਵਸਥਾ ਬਣਾਈ ਜਾ ਸਕੇ।ਸਾਲਾਂ ਦੌਰਾਨ, ਫੈਡਰੇਸ਼ਨ ਦੇ ਮੁਖੀ, ਜੋ ਅਕਸਰ ਸਿਆਸੀ ਪਾਰਟੀਆਂ ਨਾਲ ਜੁੜੇ ਹੁੰਦੇ ਹਨ, ਨੇ ਐਥਲੀਟਾਂ ਦੀ ਵੱਡੀ ਕੀਮਤ ‘ਤੇ ਆਪਣੇ ਅਹੁਦੇ ਦੀ ਦੁਰਵਰਤੋਂ ਕੀਤੀ ਹੈ। ਉੱਤਰ ਪ੍ਰਦੇਸ਼ ਦੇ ਕੈਸਰਗੰਜ ਤੋਂ ੬੬ ਸਾਲਾ ਮੌਜੂਦਾ ਭਾਜਪਾ ਸੰਸਦ ਮੈਂਬਰ ਨੂੰ ਫਰਵਰੀ ੨੦੧੯ ਵਿੱਚ ਤੀਜੀ ਵਾਰ ਰੈਸਲਿੰਗ ਫੈਡਰੇਸ਼ਨ ਆਫ਼ ਇੰਡੀਆ (ਡਬਲਯੂਐਫਆਈ) ਦੇ ਪ੍ਰਧਾਨ ਵਜੋਂ ਦੁਬਾਰਾ ਚੁਣਿਆ ਗਿਆ ਸੀ।ਸਿੰਘ ਇੱਕ ਸਾਬਕਾ ਪਹਿਲਵਾਨ ਹੈ ਅਤੇ ਤਿੰਨ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਕੁਸ਼ਤੀ ਨਾਲ ਜੁੜਿਆ ਹੋਇਆ ਹੈ।ਹਾਲਾਂਕਿ, ਡਬਲਯੂ.ਐੱਫ.ਆਈ. ਦੇ ਪ੍ਰਧਾਨ ਵਜੋਂ ਆਪਣੀ ਨਿਯੁਕਤੀ ਤੋਂ ਬਾਅਦ ਉਸ ਨੂੰ ਆਪਣੇ ਮਨਮਾਨੇ ਤਰੀਕਿਆਂ ਲਈ ਆਲੋਚਨਾ ਦਾ ਸਾਹਮਣਾ ਕਰਨਾ ਪਿਆ ਹੈ। ਫਿਲਹਾਲ, ਉਸ ‘ਤੇ ਕਈ ਮਹਿਲਾ ਪਹਿਲਵਾਨਾਂ ਦਾ ਜਿਨਸੀ ਸ਼ੋਸ਼ਣ ਕਰਨ ਦੇ ਦੋਸ਼ ਲੱਗੇ ਹਨ।
ਯੂਨਾਈਟਿਡ ਵਰਲਡ ਰੈਸਲਿੰਗ ਨੇ ਜੰਤਰ-ਮੰਤਰ ‘ਤੇ ਪ੍ਰਦਰਸ਼ਨ ਦੌਰਾਨ ਭਾਰਤ ਦੇ ਚੋਟੀ ਦੇ ਪਹਿਲਵਾਨਾਂ ਨਾਲ ਵਿਵਹਾਰ ਦੀ ਨਿੰਦਾ ਕਰਦੇ ਹੋਏ ਸਖਤ ਸ਼ਬਦਾਂ ਵਾਲਾ ਬਿਆਨ ਜਾਰੀ ਕੀਤਾ ਅਤੇ ਧਮਕੀ ਦਿੱਤੀ ਕਿ ਜੇਕਰ ਇਹ ਨਿਰਧਾਰਤ ਸਮੇਂ ਦੇ ਅੰਦਰ ਚੋਣਾਂ ਕਰਵਾਉਣ ਵਿੱਚ ਅਸਫਲ ਰਹਿੰਦੀ ਹੈ ਤਾਂ ਰਾਸ਼ਟਰੀ ਫੈਡਰੇਸ਼ਨ ਨੂੰ ਮੁਅੱਤਲ ਕਰ ਦਿੱਤਾ ਜਾਵੇਗਾ। ਯੂਨਾਈਟਿਡ ਵਰਲਡ ਰੈਸਲਿੰਗ ਨੇ ਆਪਣੇ ਬਿਆਨ ਵਿੱਚ ਕਿਹਾ ਗਿਆ ਹੈ, “ਯੂਯੂਡਬਲਿਊ ਪਹਿਲਵਾਨਾਂ ਨਾਲ ਸਲੂਕ ਅਤੇ ਨਜ਼ਰਬੰਦੀ ਦੀ ਸਖ਼ਤ ਨਿੰਦਾ ਕਰਦਾ ਹੈ। ਇਹ ਹੁਣ ਤੱਕ ਦੀ ਜਾਂਚ ਦੇ ਨਤੀਜੇ ਦੀ ਘਾਟ ‘ਤੇ ਆਪਣੀ ਨਿਰਾਸ਼ਾ ਜ਼ਾਹਰ ਕਰਦਾ ਹੈ। ਯੂਯੂਡਬਲਿਊ ਸਬੰਧਤ ਅਧਿਕਾਰੀਆਂ ਨੂੰ ਦੋਸ਼ਾਂ ਦੀ ਪੂਰੀ ਅਤੇ ਨਿਰਪੱਖ ਜਾਂਚ ਕਰਨ ਦੀ ਅਪੀਲ ਕਰਦਾ ਹੈ। ਸ਼ੁਰੂਆਤੀ ਬਿਆਨ ਤੋਂ ਬਾਅਦ ਭਾਰਤ ਵਿੱਚ ਪਹਿਲਵਾਨਾਂ ਦੇ ਵਿਰੋਧ ਪ੍ਰਦਰਸ਼ਨ ਬਾਰੇ ਵਿਸ਼ਵ ਸੰਸਥਾ ਦਾ ਇਹ ਦੂਜਾ ਬਿਆਨ ਹੈ, ਜਿਸ ਨੇ ਏਸ਼ੀਅਨ ਚੈਂਪੀਅਨਸ਼ਿਪ ਨੂੰ ਭਾਰਤ ਤੋਂ ਦੂਰ ਕਰ ਦਿੱਤਾ।ਯੂਯੂਡਬਲਿਊ ਐਡ-ਹਾਕ ਕਮੇਟੀ ਤੋਂ ਜਨਰਲ ਅਸੈਂਬਲੀ ਦੀ ਅਗਲੀ ਚੋਣ ਬਾਰੇ ਹੋਰ ਜਾਣਕਾਰੀ ਲਈ ਬੇਨਤੀ ਕਰੇਗਾ। ਇਸ ਚੋਣਵੇਂ ਅਸੈਂਬਲੀ ਨੂੰ ਆਯੋਜਿਤ ਕਰਨ ਲਈ ਸ਼ੁਰੂ ਵਿੱਚ ਨਿਰਧਾਰਤ ਕੀਤੀ ਗਈ ੪੫ ਦਿਨਾਂ ਦੀ ਸਮਾਂ ਸੀਮਾ ਦਾ ਸਨਮਾਨ ਕੀਤਾ ਜਾਵੇਗਾ। ਅਜਿਹਾ ਕਰਨ ਵਿੱਚ ਅਸਫਲ ਰਹਿਣ ਕਰਕੇ ਯੂਨਾਈਟਿਡ ਵਰਲਡ ਰੈਸਲਿੰਗ ਫੈਡਰੇਸ਼ਨ ਨੂੰ ਮੁਅੱਤਲ ਕਰ ਸਕਦਾ ਹੈ, ਜਿਸ ਨਾਲ ਐਥਲੀਟ ਇੱਕ ਨਿਰਪੱਖ ਝੰਡੇ ਹੇਠ ਖੇਡ ਮੁਕਾਬਲਾ ਕਰਨ ਲਈ ਮਜਬੂਰ ਹੋਣਗੇ।”
